Ene vièle histoire.

Din tout'l'pays, l'nouveau gouvernemint militaire i veut mette d'l'orte. In vôt bin chà dins les gazettes. Achteure, i vaut mî buzier comme tertous, et surtout... nin faire sin yar ! Ti, chà n't'a jômais fait plaiji. T'as toudis rapinsé qu'les gins qui n's'ersonnt.tent nin, ch'est chà qu'i'est gai. T'étôs bénèche d'babiller avec ène séchi d'différint, pasque t'étôs seûr qu'i'a grammint à apprinde des ceux qui n'buzit.tent pôs comme ti.

A t'n'ouvrache, chà fait lommint qu'chà n'tournôt pus bin. I fallôt toudis oeuvrer d'pus in puque, et chà n'allôt jômais assez veûte. Avec cheu qu'te ga'ne, t'avôs de'l'misère à acater à minger pou t'famile. Comme ch'étôt ti l'pus vieux dins cheul'fabrique, les autes, i v'not.tent alfôs s'plainde à ti. Chà fait qu'ène paire de kôp, t'as été treûver l'contremaîte. Combin d'fôs qu't'as voulu définde les autes, mais chà n'a jômais servi à ène séquô. Pire que chà, t'as v'nu l'bête noirte du patron ! Pour rire de ti, i t'app'lôt « camarade communiste » ! Après, i'a c'minchi à cachi misère su't'n'ouvrache. Si qu't'avôs l'malheur d'babiller avec tes cômarates, tout'd'sûte, tin chef i faijôt ène histoire. L'z-ouvris, i n'avôt.tent même pus l'temps d'mette les sécurités su les machines. Te t'souvins qu'pour finir, i'a eu in accidint avec in jôme. Chà d'vôt arriver, mais chà t'a mis dins ène rache... !

T'as été bin surpris, tchand qu'i sont v'nus buquer à t'porte in pleine nût. Te n'les avôs jômais vu, ces gins avec leu drôle d'habillache. I t'ont moutré in papi que t'n'as pôs eu l'temps d'lire. Te n'savôs nin t'in ravoir, mais i n't'a nin fallu lommint pou comprinte. I fallôt qu'te les suives sins bertonner. Et quôqu'ch'est qu'te voulôs faire, ti tout seû, adon qu'i'z-étôt.tent grammint, avec des armes. Ti, te n'as nin fait d'menoules. Ch'étôt seûrmint ène erreur que te pinsôs. Te n'voulôs pôs que t'fin.me et l'z-afants i soicht.tent réveillés. Chà n'arôt été qu'du brayache in puque. I n'arôt.tent toul'même rin pouvu faire cont'ces sauvaches !

Achteure, i'a trôs jours que te joque dins cheul'pétite cafe, sins leûmire, sins minger, et sins boire. Mon Dî, qu't'as sô ! Te n'sarôs même pôs dire édoù qu'ch'est qu't'es. Alfôs, i'a cheul grande brute qui vint t'tcheure pou ... « t'interroger » !

Monhomme, i veut tout savoir : commint qui s'appellt.tent tes amisses, édoù qu'te les vôs, tchand qu'te les vôs,... A chaque kôp que t'réponse elle ne li plaît nin, i t'flanque ène margnoufe que t'tiête elle f'rôt trôs tour ! Pôs question ichi d'avocat... T'as foque l'drôt d'dire amen. Quô qu'elle dôt buzier t'fin.me ? Elle dôt ête in foufèle d'nin savoir édoù qu't'es !... Et l'z-afants ? Les ceux in face de ti, i veult.tent tell'mint t'briji,... tellmint t'inl'ver tout cheu qui fait d'ti in homme ! Combin d'temps qu'te va t'nir ainsin, tout seû ?... T'n'as pus grammint d'espoir d'sortir de c'trôs d'rate...

Cheul'histoire, mes gins, j'l'ai ind'vintée, mais j'sus seûr qu'i'a des meûrceaux qui t'dist.tent ène séquô ! J'n'ai pôs voulu l'mette ène séchu, mais j'sus seûr qu'chà arôt pouvu ête in Chine, in Birmanie, in Amérique du Sud, ... ou même pôs si long ! J'nai pôs voulu mette ène époque, mais j'sus seûr qu'chà arôt pouvu ête i'a lommint, ... ou bin achteure ! L'malheur, ch'est qu'pour les drôts d'l'homme, in avinche pôs grammint, et qu'i'a acore bin d'l'ouvrache avant que min conte i n'soiche ène histoire du temps passé ! Pierre NOEL