Ed’ timps in timps, in erchoit comme même des beonnes nouvelles !!

Eh oui, ainsin, au Brésil, el’ mouvemint des sans tierre, i a orminté ses actions pou forcher el’ gouvernemint ed’ Lula d’rimplir ses obligations pou el’ réforme agraire !

Et’ sais, l’mouvemint sans tierre, ch’est des groupes ed’ 10 famill’s qui s’mettent insanne dins un camp et qui occupt’ent des tchamps dousqu’i n’a rin. I tir’tent l’terrain de l’a friche et i sèm’tent tout d’sortes ed’ légumes, pou eusse s’nourri ainsin qu’leu biêtes.

Ichi, au meos d’août, i zeont fait in camp énorme pou el’ réforme avec treos mille cinsiers et cinsières du pays.

Ainsin, i z’ont obtenu que l’gouvernemint i construisse 280 écoles dins les campements du mouvemint sans tierre…mais seurtout, , l’gouvernemint, i va actualiser les indices de l’productivité de l’tierre : Cha, cha veut dire qu’des terres improductives ed’ greos propriétaires privés ou d’fabrique, i vont ête esspropriés et vont ête données ou vindues à les m’tits cinsiers pou ête labourées, herchées brandlées.

Au moinsse, t’aras moins de gins qui aront faim et cha s’ra in m’tit keop pus juste pou tertouss !

Bin seure, les gros, bin, i n’sont pos d’accord et i font d’leu pids et d’leu mains pou que l’gouvernemint, i ercule

Mais comme i disot em’ comarat Paul André, i a d’l’espoir !

T’verras A nous aut’s deux, in r’mettra in grand camp d’blé, D’aveine et d’soiles. Y ara du gaune tout par tierre et du bleu tout padzeur. T’verras… Au mitan du camp in laira ène pétite guéquière, Ène petite guisse d’hierpe pou nous aut’deux, Dusqu’in ira dormir insanne quansque cha s’ra L’a-oût et qu’les nuits is seont keautes T’verras… Tout autour, les gins i pourront v’nir cweiller Les blés, les soiles et les aveines à leu n’aisse El camp i s’ra à tertouss’ T’verras… In s’ra tout m’tits pa d’zous l’z’étoiles, in s’ra Tout grands padzeur el’ tierre. In s’incrinquera L’in dans l’eaute et à nous eautes deux, avec el’ z’eautes Et l’z’aveines et les soiles autour, in rinviqu’ra l’solèl.